O pasado vernes 2 de setembro Asociación Comunidade O Zulo e o Concello de Mugardos asinaron un convenio cuxa finalidade é o financiamento para a organización e celebración dos eventos “Xornadas de software libre” e “Xornada de patrimonio cultural libre”.
A contía da subvención é de 2.500€ para a celebración das citadas actividades, importe do que a día de hoxe xa recibimos o 80% do total, e o resto despois da correspondente xustificación dos eventos.
A Xornada de Sofware Libre celebrarase a finais do mes de Outubro en Mugardos. Podemos adiantar que será en xornada de mañá e tarde, por suposto na fin de semana e contará con obradoiros prácticos e relatorios.
Para Xornada de patrimonio cultural libre contaremos con representación de diferentes colectivos e asociacións, nun formato que reunirá coloquios, obradoiros e presentación de proxectos. A nosa idea é celebrala a finais do mes de Novembro.
Despois de dous anos en branco, 2020 e 2021, nos que por circunstancias alleas á asociación finalmente non asinamos o convenio(principal fonte de financiación da asociación para realizar eventos), seguimos a traballar desde Mugardos para continuar promovendo software e cultura libre, camiño xa dos ¡20 anos!